Վերջերս <Հայփոստ Թրաստ Մենեջմենթի> եւ <Հայփոստ>-ի պատվիրակությունը Մոսկվայում հանդիպում է ունեցել Ռուսաստանի փոստի ղեկավարության հետ, որտեղ պայմանավորվածություններ են ձեռք բերվել համագործակցության առաջիկա խորացման, համագործակցության որակական նոր փուլի անցման շուրջ: Նախատեսվում է ակտիվացնել արդեն գործող մեխանիզմները երկու երկրների փոստային օպերատորների միջև, որի արդյունքում դրամական փոխանցումները, ծանրոցները, նամակները և փոստային մյուս առաքանիներն ու ծառայությունները ավելի արագ և օպերատիվ կհասնեն հասցեատիրոջը:

Ռուսաստանի և Հայաստանի փոստային օպերատորները կզարգացնեն երկու երկրների միջև արագ փոխանցումները և կմեծացնեն փոխանցումների ծավալը: Ազգային փոստային օպերատորների համագործակցության հեռանկարները քննարկել են հավատարմագրային կառավարիչ ընկերության` “Հայփոստ թրասթ մենեջմենթ”-ի գլխավոր տնօրեն Խուան Պաբլո Գեչիջյանը, “Հայփոստ”-ի տնօրենի պաշտոնակատար Հայկ Ավագյանը և Ռուսաստանի փոստի ղեկավարի տեղակալ Իգոր Մանդրիկինը:

Հանդիպման մասնակիցները որոշում են ընդունել արագ դրամական փոխանցումների կազմակերպման և փոստային փոխանակման կատարելագործման հարցերով երկու աշխատանքային խմբերի ստեղծման մասին:

Հայաստանում փոստային բաժանմունքների քանակն ավելի քան 2 անգամ գերազանցում է բոլոր առևտրային բանկերի գրասենյակների ընդհանուր թիվը. ըստ որում, փոստային բաժանմունքների մեծ մասը կենտրոնացված է մարզերում և գյուղական համայնքներում:

Միջազգային դրամական փոխանցումների տեխնոլոգիական զարգացումը Ռուսաստանի և Հայաստանի փոստային օպերատորների կայուն շուկայական դիրքերի երաշխիքն է: Դիտարկվող առաջարկների շարքում է երկրների միջև անհասցե փոխանակումների տեխնոլոգիայի ներմուծումը:

Հեռահար առևտրի զարգացումը, որը պետք է հանգեցնի առաքանիների թվի աճին, ևս մեկ խնդիր է, որ կանգնած է Հայաստանի և Ռուսաստանի փոստային օպերատորների առջև: Դրա համար նախատեսվում է Ռուսաստանի և Հայաստանի փոստային օպերատորների կատալոգներում ապրանքների փոխադարձ ներկայացումը: Ծրագրվում է ավելացնել EMS փոխանցումների ծավալը` ի հաշիվ կորպորատիվ հաճախորդների համար հատուկ ծրագրերի: